Kot í sveit

 

Mér og minni familíu var boðið í bústað með Bakarahjónunum um helgina. Dvöldum í Grímsnesinu frá laugardegi til sunnudags. Og þvílík sæla.

Hvernig stendur á því að fólk slakar betur á í bústað heldur en heima hjá sér? Er þetta nálægðin við náttúruna? Að geta setið úti á palli og heyra ekkert nema þyt í laufi og fuglasöng? Umferðarniður víðs fjarri.

Að sjá börnin koma röltandi utan úr móum, drullug upp fyrir haus með prik í hönd fyrir göngustaf er afskaplega gefandi.

Líka að finna þrastarhreiður með fjórum ungum, kyrfilega staðsett upp við húsvegg. Og á einum sólarhring sjá þá stækka, dafna, breiða úr sér og að lokum fljúga út í buskann.

Ég komst að því að eltingaleikur og feluleikur í náttúrunni í ausandi rigningu, vekur upp barnið í manni.

Heiti potturinn lét bíða eftir sér, þ.e. hann hitnaði seint, og Þann Einhverfa þraut þolinmæði, dreif sig í sundbuxurnar og brást ókvæða við þegar hin börnin stoppuðu hann. Ég kom að honum hágrátandi í sorgarferli og ákvað að best væri að leyfa honum að finna hitastigið á eigin skinni. Hann skellti sér því í  17 °C heitan (kaldan) pottinn og entist mun lengur en ég bjóst við.

Seinna tóku svo Gelgjan og Bakarasonurinn miðnætursund í pottinum en þá var hitastigið komið upp í einar 25°C.

Engum virðist hafa orðið meint af.

Mikið langar mig í lítið kot í sveitinni. Það er gott að eiga drauma.

 

Athugasemdir

[Ía Jóhannsdóttir, 2.6.2009 kl. 16:42]

Æ já verð að segja þér að þetta er bara ekki svona einfalt.  Ég átti kot í sveit og fannst ég reka hótel allar helgar hehehehe..  það var líka í Grímsnesinu.

[Jóna Á. Gísladóttir, 2.6.2009 kl. 19:50]

Æi Ía ég veit hvað þú meinar. Kannski er málið að hafa kotið bara nógu lítið svo að takmarkað af fólki komist fyrir

[Ómar Ingi, 2.6.2009 kl. 20:39]

[Linda Linnet Hilmarsdóttir, 2.6.2009 kl. 20:56]

Innlitskvitt og ljúfar kveðjur......:O)

[Hrönn Sigurðardóttir, 2.6.2009 kl. 21:29]

Ég held að slökunin felist einmitt í því... þessu að heyra ekkert nema fuglasöng og hlátur í fjarzka

[Ásdís Sigurðardóttir, 2.6.2009 kl. 21:56]

Sveitadvöl er unaðsleg. Kær kveðja

[Jenný Anna Baldursdóttir, 3.6.2009 kl. 15:47]

Jæja vinkona góð, þú ert komin á þinn stað í umræðuna á bloggforsíðu.

Og hagaðu þér svo samkvæmt því villingurinn þinn.