Ryksuguróbót og kolvitlausar kerlingar

 

Við Bretinn fórum í fertugsafmæli hjá Bakarafrúnní á föstudagskvöldið. Hefði ekki getað verið skemmtilegra. Góður matur, frábær skemmtiatriði (bæði undirbúin og óvænt) skemmtilegar ræður, nóg af brennivíni og skemmtilegt fólk.

Bakarinn laug að allri fjölskyldunni að hann ætlaði að gefa frúnni ryksuguróbótinn í fertugsafmælisgjöf. Systragengið og systradætragengið var allt kolvitlaust út í hann og hann hélt lyginni á lofti allt fram til kvöldsins. Bakarasonurinn og bakaradóttirin voru afar áhyggjufull yfir þessari vitleysu í pabba sínum. Meira að segja þau, 12 ára og 8 ára, vissu að það er barasta ekki eitthvað sem maður gerir. Að gefa konu heimilistæki í afmælisgjöf.

Bakarafrúin hringdi í yngstu systurina um miðjan dag og hjálpaði Bakaranum með lygina. Jú jú hún staðfesti að ryksuga hefði komið út úr gjafapakkningu.

Yngsta systirin kallaði mág sinn helvítis fífl og hálfvita.

Við erum sem sagt að tala um heilan helling af kolbrjáluðum kellum. En Bakarinn stóð af sér storminn og skemmti sér konunglega. Ég fékk að sitja á hliðarlínunni og fylgjast með. Mér finnst hann hafa sýnt af sér visst hugrekki í heilan dag.

 

Athugasemdir

[Högni Jóhann Sigurjónsson, 18.10.2008 kl. 22:20]

Hvað er að því að gefa húsmóðurinni ryksuguróbót og létta af henni að þurfa að ryksuga á kvöldin, er ekki hægt að láta slíkt tæki ryksuga á daginn þegar húsmóðirin er að vinna.

[Ásdís Sigurðardóttir, 18.10.2008 kl. 22:27]

Þegar hún mamma varð fertug fékk hún saumavél og mikið var hún hamingjusöm, kannski koma þeir tímar aftur. Kær kveðja

[Þorvaldur Stefánsson (IP-tala skráð) 18.10.2008 kl. 22:45]

Mér skilst að það hafi verið glatt á hjalla hjá ykkur og þessari elsku svaka lega eruð þið ornar gamlar elskurnar mínar  kveðja Valli

[María Guðmundsdóttir, 19.10.2008 kl. 07:21]

 kallskømmin....en alltaf gaman ad smá sprelli á afmælum, gott thid skemmtud ykkur vel.

[Bergljót Hreinsdóttir, 19.10.2008 kl. 09:56]

Ha ha ha....góður!!!!

[Elín Sigríður Grétarsdóttir, 19.10.2008 kl. 10:39]

aldrei myndu karlmenn skipta sér af því hvað vinir þeirra fengju í afmælisgjöf !! kerlingar eru kolvitlausar og stjórnsamar út yfir allan þjófabálk ... elska að vera kerling :D

[Rut Sumarliðadóttir, 19.10.2008 kl. 10:47]

haha, góður. Tek undir með Elínu, elska að vera kerling.

[Jenný Anna Baldursdóttir, 19.10.2008 kl. 11:20]

Ég á vinkonu sem fékk ískáp í þrítugs frá heittelskaða.

Viljið þið heyra hvort þau eru enn gift?

Æ dónt þeink só

[Ómar Ingi, 19.10.2008 kl. 14:19]

Hann veit hvað tjellingin á að vera og gera

Grí nið er hollt og gott , það eru bara sumir sem vilja ekki ná gríninu , skemmtilegt lífið já

[Hólmgeir Karlsson, 19.10.2008 kl. 14:24]

Innlitskvitt og

[Dísa Dóra, 19.10.2008 kl. 15:48]

Ég verð nú barasta að viðurkenna að ég yrði nú barasta sæl með ryksuguróbót

[Soffía (IP-tala skráð) 19.10.2008 kl. 16:14]

Verð að játa að ég fékk ryksuguróbot í afmælisgjöf síðast frá spúsa mínum  eeeen svo segir mér hugur að hann fái klósett í jólagjöf

[Hrönn Sigurðardóttir, 19.10.2008 kl. 20:51]

....en hvað fékk hún?

[Heiða Þórðar, 19.10.2008 kl. 21:00]

...ég spyr einsog Hrönn...hvað var í pakkanum?

[Högni Jóhann Sigurjónsson, 19.10.2008 kl. 21:01]

Hvaða forvitni er þetta eiginlega?

[Hulda Bergrós Stefánsdóttir, 19.10.2008 kl. 22:13]

var í fertugsafmæli um síðustu helgi, þar fékk frúin Geir Ólafs (eða hann kom og söng) ...................ég sjálf hefði kosið róbótinn, enda geng ég með mulinex á vinstri..........sko þegar ég varð þrítug sagði rafvirkinn öllum að ég fengi Mulinex.... sem var svo armbandsúr sem ég kalla Mulinexin minn

[Guðrún Una Jónsdóttir, 20.10.2008 kl. 05:09]

Hvaða viðkvæmni er þetta eiginlega .... Ég yrði himinlifandi með ryksuguróbót. Það er snöggt um skárra en æfingagalli og bumbubani......

[Brynja Dögg Ívarsdóttir, 20.10.2008 kl. 05:59]

Hehehehehe  Mig vantar ryksuguróbót, best að setja hann á gjafalistann fyrir jólin.

TAkk fyrir góðan og skemmtilegan pistil.

Kv  frá Gleymmerei og Emmu.

[Freyja (IP-tala skráð) 20.10.2008 kl. 06:15]

Hahaha! Ég óskaði mér blandara í afmælisgjöf og fékk hann frá kærastanum. Þegar ég sagið íslensku vinkonum mínum frá því þurfti ég að útskýra fyrst mjög nákvæmlega að ég hefði ÓSKAÐ mér að fá heimilistæki og hann hefði LÍKA gefið mér geisladisk. Dönsku vinkonur mínar skildu ekkert í þessari viðkvæmni í mér þegar ég fór að útskýra þetta og fannst bara mjög skynsamlegt að gefa mér heimilistæki í afmælisgjöf!! ;)

Ryksuguróbót vil ég gjarnan fá...en bumbubani myndi eflaust enda með rifrildi ;)

[Guðríður Pétursdóttir, 20.10.2008 kl. 09:43]

hvaða hvaða.. ég yrði himinlifandi með ryksuguróbót.. það mundi létta mér sko lífið..og ég tæki því ekki sem móðgun ef einhver gæfi mér það sem gjöf.. þó það væri karlinn..

Það er skárra en fjórhjólahjálmur, svo maður geti setið aftan á nýja hjólinu sem kallinn keypti sér á afmælisdaginn manns..

[Jóna Á. Gísladóttir, 20.10.2008 kl. 09:52]

Stelpur stelpur stelpur! Þið eruð ekki nógu vanþakklátar. Ef staðan er þannig (og hún á auðvitað ekki að vera þannig) að þið sjáið eingöngu um heimilisstörfin, þá er lágmark að karlinn kaupi heimilistæki til að létta ykkur róðurinn svona barasta á virkum degi. Þeirra framlag til heimilisstarfanna. Algjört lágmark.

Svona á ekki að gefa konunni sinni í afmælisgjöf. Þetta er gjöf til heimilisins. Ekki til elskunnar sinnar. Og hana nú!!!

[Hrönn Sigurðardóttir, 20.10.2008 kl. 13:16]

.....En - hvað fékk hún?

[Ása Ninna Katrínardóttir (IP-tala skráð) 20.10.2008 kl. 13:22]

Já akkúrat, þetta er gjöf til heimilisins!

Afi minn gaf ömmu minni eldavél í sextugsafmælisgjöf (það eru nú alveg 25 ár síðan) en mikið varð hún sár! Og ég skil hana bara mjög vel!

[Dísa (IP-tala skráð) 20.10.2008 kl. 16:38]

haha mikið hefði ég orðið ánægð ef ég hefði fengið svona róbót, alveg draumaverkfærið en bara svo helvíti dýrt í kreppunni :)   þetta er nebblega hlutur, sem gefur manni tíma til að ja, fara t.d. í bað með kertaljós og rauðvín, meðan róbótinn þrælar í húsverkunum,, svo vildi ég gjarnan fá garðyrkjumann og nuddara líka, svona litla húskarla sko. :)

[Jóna Á. Gísladóttir, 20.10.2008 kl. 23:02]

Hrönn. Ég man það ekki . Algjört aukaatriði. Allavega ekki búsáhald.

Ása Ninna. Ég get ekki annað en hlegið. Ji minn hvað karlmenn geta verið taktlausir. Ég vona að amma þín sagt honum til syndanna.

Dísa. Þetta er reyndar ágætis punktur hjá þér. En svo má líka segja að ef karlinn tæki að sér að ryksuga með gömlu góðu Nilfisk þá gætir þú líka lagst í freyðibaðið á meðan. Mér líst vel á þetta með litlu húskarlana

[Högni Jóhann Sigurjónsson, 21.10.2008 kl. 21:11]

Nei Jóna það á ekkert að gefa kjeddlingum heimilistæki hvursdags heldur í tækifærisgjafir og þær eiga að vera þakklátar, þær sjá um heimilisverkin og hið besta mál að létta þeim þetta og róbót er hið mesta þarfaþing því að hann kemur í veg fyrir að ryksuga sé í gangi á meðann leikurinn er.

[Jóna Á. Gísladóttir, 21.10.2008 kl. 22:26]

Högni. Hvað er síminn hjá konunni þinni? Ég þarf að tala við hana

[Högni Jóhann Sigurjónsson, 21.10.2008 kl. 22:53]

Nei, sko, Jóna mín, þannig er mál með vexti að síminn hennar er bilaður og hún veit ekki afhverju en ég veit það, æi hún var alltaf á einhverju blaðri eftir að hún kom heim úr vinnu í staðin fyrir að þrífa og svo það farið að lenda á mér að setja í uppþvottavélina.

[Jóna Á. Gísladóttir, 21.10.2008 kl. 23:24]

þú hefur kannski skutlað símanum hennar í uppþvottavélina?

[Högni Jóhann Sigurjónsson, 22.10.2008 kl. 18:04]