Elísa hvar ertu?

 

Ég auglýsi hér með eftir konu. Þetta má ekki vera hvaða kona sem er. Sú sem ég leita að heitir Elísa og á mann sem heitir Hermann.

Elísa sá mér fyrir fyrsta sumarjobbinu. Ég passaði fyrir hana lítinn kút sem heitir líka Hermann. Hann er auðvitað ekki lítill lengur. Sennileg um 25 ára.

Fyrsta daginn sem ég passaði Hemma litla fór ég með hann heim og amma kafnaði næstum því úr hlátri við að horfa á mig reyna að koma hreinni bleyju á kútinn. Ég kunni ekkert til verka og þetta var á tímum taubleyjanna og plastsins sem maður batt utan um litlu kroppana. Hemmi litli var sprækur snáði og skreið alltaf út úr höndunum á mér. Það var held ég á því andartaki sem ég ákvað að eignast ekki sjálf börn fyrr en einhver finndi upp bréfbleyjur.

Elísa gladdi mig mikið um daginn þegar hún setti inn komment hjá mér og svo bað ég hana um netfangið hennar. Hún gaf mér það upp hér á blogginu en það er sama hversu oft ég skrolla hér fram og til baka í færslunum mínum.. ég finn þetta ekki.

Svo Elísa mín. Ef þú lest þetta viltu þá senda mér tölvupóst á [e-mail]. Mig langar afskaplega mikið að heyra í þér.

 

Athugasemdir

[Elísa (IP-tala skráð) 14.8.2007 kl. 22:50]

Elsku Jóna, ég kíki oft inn á bloggið þitt og finnst þú alveg dásamlegur húmoristi og pennafær með afbrigðum. Það er ekki spurning að litla ljóshærða dúllan í bleika peysusettinu sem kom að passa hjá mér er orðin stór og þroskuð kona og hefur skemmtilega sýn á lífið og tilveruna og hef ég grun um að hún hafi líka upplifað ýmislegt sem gefur henni þennan þroska. Sendi þér mail dúlla og hlakka til að ná sambandi við þig aftur eftir öll þessi ár. Hermann er orðin klippari á Skjá1 þannig að honum hefur ekki orðið meint af misheppnuðum bleyjuskiptum;)

Knús

[Ásdís Sigurðardóttir, 14.8.2007 kl. 23:01]

Heyrðu bara svindlað út í eitt ?? er tengdó komin og tekin við þrifunum eða hvað??  en gott að þú skildir finna Elísu svona fljótt

[Elísa (IP-tala skráð) 14.8.2007 kl. 23:08]

Sumar tilviljanir eru merkilegri en aðrar, ég átti greinilega að kíkja á bloggið hennar Jónu í kvöld

[Katrín Snæhólm Baldursdóttir, 14.8.2007 kl. 23:15]

Tilviljanir eru EKKI til. Allt er eins og það á að vera. Frábært að þið hafið náð sambandi aftur.

[Jenný Anna Baldursdóttir, 14.8.2007 kl. 23:44]

Gaman að þið hafið náð saman.  Krúttlegt

[krossgata, 15.8.2007 kl. 00:10]

Upphaflega skráði ég mig á moggabloggið til að geta skrifað kveðju hjá konu sem hafði verið vinkona mín í æsku og ég ekki séð í áratugi.    Þá reyndar undir fullu nafni, sú skráning gufaði svo upp af einhverjum undarlegum orsökum og allar tilraunir til endurheimtar mistókust, svo ég fékk mér nýtt nafn á endanum. 

  Enda hver nennir að skrá sig inn undir:  Ingibjörg Sigríður Ragnhildur Guðmundína Alfreðsdóttir

[Jenný Anna Baldursdóttir, 15.8.2007 kl. 00:20]

[Rúna Guðfinnsdóttir, 15.8.2007 kl. 02:21]

Hlýtur að vera gaman að heyrast eftir svona langan tíma

[Edda Agnarsdóttir, 15.8.2007 kl. 07:07]

Súper þegar nostalgían vitjar manns þá þennan hátt!

[Kristín Katla Árnadóttir, 15.8.2007 kl. 11:11]

Gaman af þessu Jóna.

[Eiríkur Harðarson, 15.8.2007 kl. 20:16]

Þetta er yndislegt að lesa, eftir þessar sýklingjandi  fréttir af netmálefnum. Nær allar fjalla ALLT of mikið um skuggahliðarnar er fylgja þessu þarfaþingi, sem internetið er.

[Guðrún B. (IP-tala skráð) 15.8.2007 kl. 22:31]

Bara að kikja á þig Jóna mín og segja Hæ. 

[Jens Guð, 15.8.2007 kl. 22:41]

  Mikið er gaman að sjá hvernig bloggið tengir fólk aftur saman.  Sjálfur hef ég í bloggheimi endurnýjað kynni við nokkur gömul skólasystkini,  gamla vinnufélaga og gamla kunningja.  Þetta er gaman.