Hamfarir á föstudegi

 

Síðastliðinn föstudagsmorgunn vaknaði ég á slaginu hálfátta. Sem er ekki gott því það er á sama andartaki og skólabíllinn er fyrir utan að sækja Þann Einhverfa.

Ég nuddaði stírurnar úr augunum, andaði rólega inn, andaði rólega út og fór inn til stráksa til að vekja hann. Hann var nú ekkert á því. Svo hringdi ég í bílstjóra skólabílsins og tilkynnti honum að ég hefði verið að opna augun.

Já, sagði Kiddi bílstjóri hinn rólegasti. Mér fannst húsið ykkar eitthvað drungalegt þegar ég renndi upp að því áðan.

Svo var Þeim Einhverfa dröslað fram úr og tilkynnt að í dag væri það bíllinn hans pabba sem kæmi honum í skólann.

Það féll ekki í kramið frekar en fyrri daginn. ''Rúta, rúta'' endurtók hann í sífellu og var hundfúll. Og svo grét hann yfir snjónum. ''Ekki snjór....''

Ég hef verið svo upptekin í vinnunni og á framabrautinni hvað varðar bókina að ég gaf mér aldrei tíma í síðustu viku, til að gera hið venjulega vikuplan fyrir drenginn. Ég krotaði því í flýti á blað, föstudag, laugardag og sunnudag.

Á föstudag skrifaði ég efst: pabba bíll - skóli. Og á laugardag: kannski snjór farinn.

Þegar loks, eftir 70 mínútna þref og grát, dundi annað áfall yfir. Annar spiderman-fingravettlingurinn fannst ekki.

Ó nei, sagði Sá Einhverfi. Hvar er vettlingur? Hvar er vettlingur.

Þetta var skelfilegur dagur. Hamfarir hreint út sagt. Engin rúta, snjór úti og Spiderman týndur. Það eru nú takmörk fyrir því hvað hægt er að bjóða einu barni upp á.

Það var verulega ósáttur drengur sem ók burt með pabba á Yaris-num.

Þegar þeir voru farnir rak ég augun í blaðið með planinu.

Þar var búið að krota yfir ''pabba bíll'' og skrifa ''rúta'' í staðinn.

Og á laugardeginum stóð nú bara: ''snjór farinn.''

Ég brosti með sjálfri mér. Sannfærðist endanlega um að merking orðsins ''kannski'' vefst ekkert fyrir gaurnum mínum. Snjórinn skyldi vera farinn á laugardag og ekki orð um það meir. Það breytti því þó ekki, að hér upp á fjöllum, sat snjórinn sem fastast alla helgina.

 

Athugasemdir

[Ragnheiður , 24.11.2008 kl. 00:24]

Algerlega er ég handviss og pottþétt á því að ég þekki vel Kidda bílstjóra !!

Hann tekur stórum framförum hann Ian, það er hrein unun að lesa þó að hann hafi verið ósáttur í og með. Ég er nákvæmlega sammála honum með snjóinn!!

[Linda Linnet Hilmarsdóttir, 24.11.2008 kl. 00:31]

Takk takk fyrir mig elsku Jóna mín  og góða nóttina mín kæra

[Ómar Ingi, 24.11.2008 kl. 00:32]

[Jóna Kolbrún Garðarsdóttir, 24.11.2008 kl. 00:44]

  Skemmtileg lesning

[Brynja Dögg Ívarsdóttir, 24.11.2008 kl. 00:58]

Gaman að lesa þessa færslu hjá þér, Hafið það sem allra best.

Kv Gleymmerei og Emma. 

[Lilja Guðrún Þorvaldsdóttir, 24.11.2008 kl. 01:08]

Hann er enn sama "dásemdin" þessi drengur. - Alveg ótrúlegur. -

[A.L.F, 24.11.2008 kl. 01:39]

Krúttið, ákveðin ungur maður þarna á ferð :)

[Lísa Björk Ingólfsdóttir, 24.11.2008 kl. 01:42]

Æ - ég vona að fingravettlingurinn hans finnist.  Ég eiginlega fann bara til með honum þegar ég las þetta, en snjall er hann.   Snjór farinn.  Góður.

Það getur verið agalegt að sofa yfir sig.  Sem betur fer er það í mínu tilfelli það að miðjan mín kemur of seint í skólann og litlan mín missir af ávaxtastund í leikskólanum (þegar hún kemst þá í hann) - sem henni finnst slæmt.  Ég sit svo með samviskubit yfir að hafa sofið yfir mig.......

En maðurinn minn toppar það nú að lenda illa í því að sofa yfir sig.  Hann svaf yfir sig sl. föstudag og það fékk sko alþjóð að heyra það.....  Hann fékk svo náttúrulega símhringingar um daginn þess efnis að hægt væri að fá fínar vekjaraklukkur fyrir lítið. 

Málið var að hann átti að vera í útvarpinu kl. 8 um morguninn.  Litlan var (og er - alltaf) veik svo það var mín vakt heima.  Þar sem miðjan mín var ekki heima þá var ég ekkert að stilla mína klukku. Við litla vöknum um níuleytið - ég pikka í minn og segi "bíddu, átt þú ekki að vera í útvarpinu"?  Minn spratt upp eins og ég hefði stungið hann rassinn með heygaffli og í símann.  Stuttu síðar fengu íslendingar að heyra það tillkynnt á langbylgju að hann hefði sofið yfir sig........ og ég mun örugglega minna hann á þetta reglulega næstu tuttugu árin eða svo .

[María Guðmundsdóttir, 24.11.2008 kl. 06:09]

já bara must ad Spiderman vettlingurinn finnist aftur svo hann geti tekid gledi sína á ný.

hafdu góda viku Jòna  

[Hrönn Sigurðardóttir, 24.11.2008 kl. 08:22]

[Ásdís Sigurðardóttir, 24.11.2008 kl. 10:21]

Þetta er dásamlegur lestur þó svo að þetta hafi örugglega ekki verið dásamleg uppákoma, þér tekst að skemmta okkur með þessu, en oft hlýturðu að vera mikið þreytt mín kæra.  Eigið góða viku.

[Steingerður Steinarsdóttir, 24.11.2008 kl. 12:18]

Life is what happens while your busy doing other things.

[Rut Sumarliðadóttir, 24.11.2008 kl. 12:34]

[Sigríður Sigurðardóttir, 24.11.2008 kl. 14:14]

[Birna Dis Vilbertsdóttir (IP-tala skráð) 24.11.2008 kl. 14:15]

Framfarir Ians eru stórkostlegar.Hann er frábær strákur

[Sporðdrekinn, 24.11.2008 kl. 14:35]

[Linda litla, 24.11.2008 kl. 15:21]

Það er langt sían ég hef kvittað hjá þér Jóna, takk fyrir skemmtilega lesningu.

[Helga Magnúsdóttir, 24.11.2008 kl. 20:32]

Það er greinilegt að Sá Einhverfi vill hafa stjórn á sínu lífi, bæði veðurfari og öðru. Vonandi finnst vettlingurinn hans.

[disagests (IP-tala skráð) 24.11.2008 kl. 20:39]

Já mín elskuleg. Sonarsonurinn er "sá einhverfi" í minni fjölskyldu þó svo hann sé bara á biðlista á Greiningarstöðinni. Næsta haust verður hann skólabarn og VÁ!!! hvað væri gott að fá greiningu miklu fyrr, en svona er lífið. SHIT! Það er stundum svooooo erfitt.

[Sólrún Guðjónsdóttir (IP-tala skráð) 24.11.2008 kl. 22:53]

Hvernig er það hefur drengurinn ekkert nafn

[Ómar Ingi, 24.11.2008 kl. 23:00]

Þessi yndislegi drengur heitir Ian , keyptu bókina Rúnsól

[Helga skjol, 24.11.2008 kl. 23:02]

[Guðríður Pétursdóttir, 25.11.2008 kl. 00:16]

frábært að hann skuli sjálur bara krota það sem hann vill fá.. eins og með jólapakkana í fyrra og svoleiðis.. hann bara algjört æði..

segi eins og Ásdís,´þið hljótið oft að vera svollítið þreytt..