Næst vel ég gufuna takk

 

Í dag hugsaði ég mér gott til glóðarinnar eftir vinnu.

Alla jafna get ég ekki farið í ræktina eftir vinnu, þar sem ég þarf að vera komin heim í tíma fyrir Þann Einhverfa. En hann fór í skammtímavistunina í dag og Gelgjan á fimleikaæfingu. Mér fannst ég frjálsasta manneskjan í öllum heiminum.

Planið var að fara í ræktina kl. 16:30 og taka allan pakkann. Nýta allar 50 mínúturnar sem eru í boði, fara í sturtu á eftir og svo í GUFU. Fíla mig eins og Hollywood stjörnu sem væri á launum við að liggja í dekri og vera á egó-flippi.

En stundum fara hlutirnir ekki eins og ætlað er, ég rauk út úr vinnunni allt of seint, keyrði til Báru vinkonu minnar (JSB) og 2 mínútur í leikfimitíma var ekkert stæði að finna. Ég tók skyndiákvörðun. Ég þoli ekki að missa af upphitun í þessum tímum svo ég ákvað að drífa mig heim, galla mig upp og fara með Vidda hund hringinn í kringum Rauðavatn. Þessi göngutúr tekur klukkutíma ef ég geng rösklega og það er jafn góð líkamsrækt og hver önnur. Að vísu er engin vatnsgufa heima hjá mér en alveg ágætis sturta.

Um leið og Viddi sá mig taka fram gönguskóna og vindbuxurnar byrjaði hann að hoppa og hringsnúast í forstofunni eins og upptrekktur leikfangahundur. Upp, vinstri snúningur, upp, hægri snúningur...

Loksins var kellingin komin í allan gallann og út héldum við. Regndroparnir voru kaldir viðkomu en það var næstum því logn. Viddi var eins og kálfur á vori og afskaplega kátur.

Niðri við Rauðavatn höndlaði hann illa spenninginn þegar úr einni átt nálguðust okkur tveir hestar með knapa og kona með svarta labradortík úr annarri. Viddi byrjaði að gelta enda Íslendingur af lífi og sál og vildi fá að þefa af þeirri svörtu. Fannst hún eflaust afar myndarleg og spennandi. Labradortíkin var laus, enda hlýðin og róleg stelpa.

Ég bauð glaðlega góðan dag en tíkin sýndi Vidda netta fyrirlitningu og eigandi hennar sýndi okkur báðum ýkta fyrirlitningu. Hunsaði kveðjuna frá mér og strunsaði áfram. Fannst þessi geltandi íslenski vitleysingur hvorki sér né tíkinni samboðin og ég sennilega mjög neðarlega í goggunarröðinni fyrir að eiga hund sem geltir.

Við Viddi héldum í humátt á eftir þeim mægðum, ég hálfmóðguð en Viddi fann greinilega lyktina af tíkinni allan hringinn í kringum fjandans vatnið og hagaði sér eins og vitleysingur. Það verður sko klippt undan honum fljótlega.

Skömmu seinna mættum við virðulegum bulldog með eiganda sínum. Viddi sýndi enga stillingu frekar en fyrri daginn og rauk til á hans allra heilagasta. Sko hundsins. Vonaðist sennilega til að hafa hitt á aðra tík. Bulldoginn var ekki par hrifinn af þessum yfirgangi, urraði valdsmannslega  og áður en Viddi vitleysingur vissi hvaðan á sig stóð veðrið, lá hann skjálfandi undir hundinum og þorði sig ekki að hreyfa. Hinn stóð virðulegur og sigri hrósandi yfir honum og vissi sem var, að hann hafði sýnt Davíð hvar hann keypti ölið.

Það hlakkaði örlítið í mér og ég róaði órólegan eigandi hundsins sem hélt sennilega að ég yrði brjáluð. Ég veit bara að ef Viddi væri krakki þá væri hann lagður í einelti í skóla því hann færi svo í taugarnar á hinum krökkunum. Öðrum hundum finnst hann bara ótrúlega pirrandi.

Við komum heim eftir klukkustundar göngutúr, blaut eins og hundar af sundi dregnir. Ég fann hvorki egóistann né Hollywood stjörnuna í sjálfri mér á þessum klukkutíma.

 

Athugasemdir

[Jenný Anna Baldursdóttir, 7.11.2007 kl. 23:57]

Svo mikla Jónu að finna í eftirfarandi:"Það verður sko klippt undan honum fljótlega." ROFL

Hei var ekki hittingur í kaffi áætlaður á þessum frelsisdögum? Ég spyr háðulega.

[Jóna Á. Gísladóttir, 8.11.2007 kl. 00:01]

heyrðu... frelsisdagar eru að fara fyrir lítið. Boðið í afmæli á morgun eftir vinnu. En svo á ég Breta sem er betri en enginn. Kaffi almost anytime honey

[Ívar Pálsson, 8.11.2007 kl. 00:11]

Það minnkar eitthvað fjörið í Vidda fljótlega, sýnist mér!

[Jóna Á. Gísladóttir, 8.11.2007 kl. 00:14]

Já Ívar ef ég fæ einhverju ráðið

[Guðrún Jóhannesdóttir, 8.11.2007 kl. 00:16]

það er eins gott að karlpeningurinn hagi sér vel

Aumingja Viddi

Knús

[Marta B Helgadóttir, 8.11.2007 kl. 00:19]

Frábær 

Fór líka í hundblautan göngutúr í kvöld og það var æðislega hressandi.  Oft þrælfyndið í göngutúrum að hitta á hundaeigendur í glímu við dýrin sín og annarra  

[Ásdís Sigurðardóttir, 8.11.2007 kl. 00:28]

Vona að þú notir ekki sömu aðferð á Bretann ef hann er með stelpulæti    Viddi er bara eðlilegur Íslendingur og ekkert snobb.

[Ómar Ingi, 8.11.2007 kl. 00:42]

Greyið Viddi

[Guðríður Pétursdóttir, 8.11.2007 kl. 01:54]

þér hefur liðið frekar eins og starfsmanni hollywood stjörnu sem var sett fyrir að viðra hundinn rétt áður en þú ættir að fara og ná í gulrótarköku gerða úr nýuppteknum gulrótum og fara með galakjólinn í hreinsun

[Sigríður Hafsteinsdóttir, 8.11.2007 kl. 03:33]

Hva, auðvitað varstu Hollívúdd stjarna! Fattaðiru ekki að þetta var einmitt krúsjal lykilatriði í nýjustu Óskarsverðlaunamyndinni og þú, aðalhetjan, varst þarna úti að ganga í rigningunni að hugsa um lífið og ALLT og í bakgrunninum ómaði e-r svona kvikmyndatónlist...........pjúff...löng setning hjá mér...

[Ásta Pálína Hartmannsdóttir (IP-tala skráð) 8.11.2007 kl. 07:33]

Vá hvað ég kannast við svona hundagöngu sögu   ég fæ alveg flash back úr mínum göngutúrum

[Harpa Oddbjörnsdóttir, 8.11.2007 kl. 08:37]

"Ég veit bara að ef Viddi væri krakki þá væri hann lagður í einelti í skóla því hann færi svo í taugarnar á hinum krökkunum. Öðrum hundum finnst hann bara ótrúlega pirrandi."  hér brjálaðist ég úr hlátri, ein með sjálfri mér í vinnunni..Jóna þú bjargaðir enn einum dimmum morgninum Takk fyrir mig 

[Sunna Dóra Möller, 8.11.2007 kl. 09:39]

Ég þekki Rauðavatnsgöngur vel ...hætti þó að fara fyrir stuttu....of margir hestar og hundar fyrir mig sem er skelfingu lostin við dýr ! Manninn mín fer núna bara einn !

[krossgata, 8.11.2007 kl. 10:02]

Einhverra hluta vegna verður mér hugsað til skötusels þegar talað er um að klippa burt kúlurnar hans Vidda.  Skötuselskarlinn getur ekki veitt og verður sníkjudýr á "skötuseljunni", þar veslast hann upp og verður eiginlega bara að eistum.  Þeim er misskipt gæðunum í þessum heimi.  Einn missir kúlur en annar endar sem bara kúlur. 

[Kristín Katla Árnadóttir, 8.11.2007 kl. 10:28]

HaHa mér finnst þetta svo fyndið jóna að ég sprakk af hlátri Æi elsku Viddi þinn.

[Heiða B. Heiðars, 8.11.2007 kl. 11:45]

Hollywoodstjarnan er í naglanum og egóistinn er í pennanum;)

[Edda Agnarsdóttir, 8.11.2007 kl. 13:56]

Krúttlegt þótt ekki sé minn sagt! Knús á þig Jóna mín, vonast til að hitta þig einhverntíma hjá Báru!

[Jóhanna Magnúsar- og Völudóttir , 8.11.2007 kl. 15:20]

Fyrirsögnin þín var villandi fyrir mig í þetta skiptið! .. Hélt þetta tengdist útvarpsstöðvum, hefðir heyrt eitthvað hræðilegt á Bylgjunni eða FM og værir bara ákveðin í að stilla á gufuna hér eftir! .. Eins gott að dæma ekki bara eftir ,,headlines" ... er annars reynd ,,hundamamma" átti yndislega,  ekkert allt of vel gefna tík (sorry Hneta í hundahimnum).. hún var svolítill töffari og fattaði oft ekkert goggunarröðina..  .. 

[Hulda Bergrós Stefánsdóttir, 8.11.2007 kl. 16:01]

Segi það sama og Jóhanna, hélt að þú vildir bara hlusta á "gömlu góðu gufuna"

En er þetta ekki týpískt með íslenska karlmenn (hvort sem þeir eru af hundakyni eða mannlegu) sjálfsagt þakkar Bretinn sínu sæla eftir að lesa þessa færslu

[Helga Linnet, 8.11.2007 kl. 17:49]

Hefur þér aldrei dottið til hugar að verða rithöfundur

Eins gott að kallinn þinn sýni ekki tilburði af hrifningu í garð hins kynsins (að þér undanskilinni) svo þú hótir ekki að klippa undan honum  ROFL

[alva (IP-tala skráð) 8.11.2007 kl. 19:54]

aaahhhh, verandi FYRIR UTAN ræktina og 2 mín í tíma og hætta við, bruna bara í burtu aftur, mér finnst það svo frábært. hmmm, hóst, hóst, kannast nebbenilega við svona hátterni hjá sjálfri mér...hei, snobbið með hundinn svarta, það er bara eitt sem þarf að gera og hefur eitthvað með strigapoka og þunga steina að gera...hóst.

[Jenný Anna Baldursdóttir, 8.11.2007 kl. 20:00]

Meil honní

[Birna Dis Vilbertsdóttir (IP-tala skráð) 8.11.2007 kl. 20:01]

 Viddi er eins og chi váa(kann ekki að skrifa það) og litlir kallar. Ekkert nema hávaðinn.Ekki eru kúlurnar teknar af háværum og montnum köllum því þá Vidda vitleysing?

[Gunnar Helgi Eysteinsson, 8.11.2007 kl. 20:04]

[Anna Ólafsdóttir (anno) (IP-tala skráð) 9.11.2007 kl. 00:30]

Sko ég var mest að pæla í titlinum, var alltaf að bíða eftir því að þú færir að skrifa eitthvað um Rás 1. Langar leiðslur - þorrí.

... En eftir að hafa kynnst honum Vidda og þér þá er ég eiginlega móðguð út í þessa með labradorinn.

[Bjarni (IP-tala skráð) 10.11.2007 kl. 10:37]

Ég er bara að lesa þetta blogg í fyrsta sinn en þú hefur greinilega eitthvað alveg sérstakt. Óborganleg nálgun á hlutina.