Hvaðan kemur fýlan

 

Ég fór í Kolaportið í dag og keypti mér hvít stígvél fyrir 500 kall. Þess utan græddi ég skó og tösku sem Helgu hálfsystur vantaði að losna við.  Guð blessi hana Helgu hálfsystur. Svo keypti ég mér hallærisleg gleraugu í Tiger. Lillablá með steinum. Þurfti að skerpa sjónina fyrir saumaskapinn. Það má eiginlega segja að saumaskapurinn hafi átt hug minn allan í þunglyndiskastinu undanfarið. Enda hefur skotgengið með myndina sem ég er að sauma.

Nú hef ég kveikt á 9 kertum í stofunni og borðstofunni. Kveikt er á lömpum í öllum hornum en að öðru leyti eru ljósin slökkt. Gelgjan er hjá Viðhenginu, Unglingurinn hangir uppi í herberginu sínu, Bretinn lagði sig.. er eitthvað slappur, og Sá Einhverfi er í sínu herbergi að stúdera hulstur af DVD myndum.

Ég er því ein með sjálfri mér, sofandi hundi og blogginu sem ég hef heimsótt ansi takmarkað síðustu vikur.

Það er huggulegt og lágstemt í kringum mig, þó að Sá Einhverfi hafi komið hlaupandi niður stigann rétt áðan með hávaða og látum. ÞEGIÐU, kallaði hann í sífellu. Ég veit að hann er ekki að tala við mig og nenni ekki að ávíta hann.

Uppþvottavélin suðar, mér á vinstri hönd og hundurinn hrýtur lágt í antiksófanum hennar ömmu, hér hægra megin við mig. 

Sem sagt huggulegt, rólegt og akkúrat eins og laugardagskvöld eiga að vera. Það eina sem brýtur upp stemninguna er þessi skítafýla sem leggur fyrir vit mér. Ég þarf virkilega að fara og finna út hvort þetta komi frá hesthúsahverfinu í Víðidal, eða hvort einu af heimilisdýrunum hafi orðið brátt í brók, hér í einhverju horninu.

Að því loknu ætla ég að steikja hamborgara ofan í þá fjölskyldumeðlimi sem hafa áhuga.

 

 

 

Athugasemdir

[Ómar Ingi, 28.2.2009 kl. 20:04]

 Sá Einhverfi er í sínu herbergi að stúdera hulstur af DVD myndum.

[Jón Agnar Ólason, 28.2.2009 kl. 20:28]

Hey - heil færsla á Moggablogginu?! Tímabær glaðningur!

En hvað er að heyra með að lundin hafi legið niðri undanfarið? Ég er svolítið frönskusmitaður frá fyrri tíð en ég veit um tvö meðul við stuðleysi sem bæði eiga rætur að rekja til Frankríkis; annað er bíómynd og hitt er bók.

Le Fabuleux Destin d'Amélie Poulain - eða Amélie eins og hún heitir utan Frakklands - er ein af þeim myndum sem maður skilur bara ekki hversu góðar eru fyrr en maður sér hana. Þetta meistaraverk kemur mér alltaf í gott skap, og skilur við mann hugsi og skælbrosandi í senn.

Le Petit Prince - Litli prinsinn - er ein af meistaraverkum franska flugmannsins og rithöfundarins Antoine de Saint-Éxupery, en allt sem hann setti á blað er snilld. Þessi bók hans er frábrugðin hinum að því leyti að hún er sett upp sem barnabók en fljótlega áttar lesandinn sig á því að hann er að lesa efnismeiri og merkingarþrungnari texta en flest "fullorðins" sem maður hefur lesið. Enginn sem les þessa bók gleymir henni, og enginn les hana bara einu sinni.

Með ósk um hækkandi sól, bæði í heiði sem og í sinni 

kv.,

[Jenný Anna Baldursdóttir, 28.2.2009 kl. 22:45]

Knús á þig.  Hvenær á að kíkja?

[Ía Jóhannsdóttir, 1.3.2009 kl. 06:40]

Gaman að heyra frá þér Jóna mín. 

[María Guðmundsdóttir, 1.3.2009 kl. 10:47]

notalegt barahafdu gódan sunnudag Jóna.

[Anna , 1.3.2009 kl. 11:44]

Góður díl í Kolaportinu. En þú minntist ekki á manninn þinn.

[Linda Linnet Hilmarsdóttir, 1.3.2009 kl. 15:48]

Knús knús og ljúfur faðmur af ást og hlýju til þín elskulegust.....Ástarkveðjur frá mér til þín..:=)