Mamma róa sig barasta

 

Það er kominn tími á bloggfærslu en ef ég ætla að ná settu marki varðandi bókaútgáfu fyrir næstu jól (fáránlegt að vera að tala um ''jól-eitthvað''... jólin eru ný liðin) þá má ég ekki vera að eyða kröftunum í persónuleg skrif á blogginu. Því miður getur maður víst ekki gert allt sem mann langar.

Því má vel vera að þessi færsla verði sú fyrsta og síðasta í langan tíma.

Ferming Hafliða frænda er að baki og gifting ''litlu'' frænku minnar og flotta mannsefnisins hennar er um næstu helgi.

Að baki er líka vikulöng dvöl hjá Berlínar-Brynju, í Berlín að sjálfsögðu. Ég fór í tvennum tilgangi: að heimsækja Brynjuna mína og að sanna það fyrir mér í eitt skipti fyrir öll að ég GÆTI skrifað bók. Skáldsögu. Því ef ekki er hægt að gera það, fjarri daglegu amstri hversdagsins, brjáluðum börnum o.sfrv., í fallegri íbúð í spennandi borg.... ´

Mér gekk hreint ágætlega að skrifa og átti svo ljúfar stundir með Brynju á kvöldin og yfir helgina, þar sem leyndardómar lífsins og það sem er handan þess voru ræddir, metnir og krufnir til mergjar. Sötrað rauðvín, hvítvín og ómælt magn af sparkling water. Markaðir, kaffihús, skógar og fleiri staðir voru þræddir.

Kyrrðin í skóginum var rofin......

 

 

Ómetanlegur bónus í þessari ferð var hvíld og friður. Sjaldan eða aldrei hefur sálin fengið jafn mikla næringu og hvíld eins og á þessum 7 dögum.

Og aldrei þessu vant tók það mig ekki viku að aðlagast fjölskyldulífinu aftur og enginn fór í mínar viðkvæmu taugar, eins og hefur viljað verða þegar ég hef snúið heim aftur eftir stutt frí. 

Sá Einhverfi tjáði sig lítið um fjarveru mína en þegar seig á seinni hlutann á ferð minni, sá hann tvisvar sinnum ástæðu til að nefna þetta við pabba sinn: mamma koma heim.

Já, mamma kemur heim á fimmtudaginn, svaraði Bretinn.

''Já'' sagði Sá Einhverfi þá. Ánægður að fá staðfestingu á að kerlingin myndi nú þrátt fyrir allt skila sér aftur.  

Hann stefnir hraðbyri í gelgjuna drengurinn og nýjasti uppáhaldsfrasinn er: mamma rólegur.

Ég er að vinna í því að koma honum í skilning um að það er pabbi sem þarf að vera rólegur en mamma bara róleg.

Við áttum snörp orðaskipti í bílnum á leiðinni heim í dag. Hann týndi öðrum af sínum heittelskuðu Spiderman-hönskum í Vesturhlíð og var öskureiður, sár og fúll yfir því að ég skyldi ekki geta galdrað hanskann fram úr minni eigin ermi þegar ég kom að sækja hann.

Ian þú týndir hanskanum. Ekki ég. Þú þarft að læra að passa upp á dótið þitt.

Orðið ''týndir'' gerði hann alveg kolvitlausan og hann byrjaði að öskra á mig.

Það líð ég ekki börnunum mínum, einhverfum eða ekki svo ég öskraði á hann á móti.

Þá kom áþreifanleg þögn í nokkrar sekúndur, svo sagði hann hneykslaðri röddu úr baksætinu:

Mamma rólegur.

 

 

Athugasemdir

[Anna Guðný , 31.3.2009 kl. 00:09]

Úff, þau eru ótrúleg þessi börn, einhverf eða ekki. Ég lenti í atviki á mínu heimili í gær sem hefur aldrei gerst áður. Mamma tók á því og það fór mjög vel en........

Gaman að sjá skrif hjá þér

Hafðu það gott

[Anna Margrét Bragadóttir, 31.3.2009 kl. 00:26]

Gaman að fá færslu frá þér,ég sakna þeirra

Sennilega hefði ég nú sprungið úr hlátri ef ég hefði verið með ykkur mæðginunum í dag,hann er svo mikill snillingur hann frændi minn

Takk fyrir alla hjálpina um helgina og samveruna,þetta var bara æðislegt

Love you

[Steingrímur Helgason, 31.3.2009 kl. 00:39]

Bara notalegt að vita af því að þú hafðir það notalegt.

Þú átt að skrifa meira á bloggi, það er ekki alveg einz & það eyðizt eitthvað upp á manni/konu rithöndin þó að merkir rithöfundar láti eftir sér einstaka dægurmálapiztil.

Sama skal yfir alla ganga, þannig að ..

"Vertu rólegur"

[Hilmar Gunnlaugsson, 31.3.2009 kl. 01:08]

Hún hefur verið skemmtileg þessi ferð

[Kjartan Pálmarsson, 31.3.2009 kl. 09:24]

[Ragnheiður , 31.3.2009 kl. 11:29]

Æj hann hefur orðið alveg klumsa kappinn...

Mamma rólegur bara og veistu það eru þegar komnir 3 mánuðir frá síðustu jólum og það þýðir að það er um það bil meðgöngutími fram að næstu jólum. Það hlýtur að henta vel fyrir konu með bók í maganum...?

Kveðja

[Sporðdrekinn, 31.3.2009 kl. 13:09]

Dúlluleg myndin af thér :o) Já thad bara hlítur ad vera gott ad komast í burt í smá tíma.

Drengurinn er œdi!

[Guðríður Pétursdóttir, 31.3.2009 kl. 18:41]

Já Jóna, slakaðu á manneskja :D

En já ég öfunda þig að hafa komist í burtu í heila viku og það til annars lands .. hafðu það gott og gangi þér vel við skriftirnar

[Ómar Ingi, 31.3.2009 kl. 19:17]

[Helga Magnúsdóttir, 31.3.2009 kl. 19:37]

Gangi þér vel að skrifa. Ljótt samt af þér að láta mann fara að telja dagana til jóla í mars.

[Guðrún Emilía Guðnadóttir, 31.3.2009 kl. 19:55]

Yndislegt að þú skildir fá gott frí, já og mamma rólegur er nú bara að hann er að reyna að standa á því sem hann heldur að sé rétt þessi elska.
knús til ykkar allra
Milla.

[Helena Vignisdóttir (IP-tala skráð) 31.3.2009 kl. 19:57]

Þú ert yndislegur penni Jóna og mikið hlakka ég til að lesa eftir þig skáldsögu um næstu jól, bókin þín um "þann einhverfa og ykkur hin" var frábær lesning, gangi þér vel að skrifa

[Hulda Bergrós Stefánsdóttir, 31.3.2009 kl. 22:31]

ljúft

[Högni Jóhann Sigurjónsson, 31.3.2009 kl. 22:49]

Ian alltaf flottur.

[Ragnhildur Jónsdóttir, 1.4.2009 kl. 00:38]

Þú ert algjör snilldarpenni Jóna Ég hlakka virkilega mikið til að sjá bókina sem er í smíðum hjá þér, líst á þig kona!

Frábær myndin af þér

[Linda Linnet Hilmarsdóttir, 2.4.2009 kl. 18:16]

Innlitskvitt og ljúfar notalegar kveðjur

[Kristín Katla Árnadóttir, 3.4.2009 kl. 11:02]

[Kolbrún Jónsdóttir, 3.4.2009 kl. 21:20]

Mikið rosalega er þetta flott mynd af þér Jóna

[María Guðmundsdóttir, 5.4.2009 kl. 06:50]

 frábær færsla, en eitthvad kannast ég vid gelgju...hérna megin er thad "mamma slakadu á" i annarri hverri setningu....

[Júlía Margrét (IP-tala skráð) 9.4.2009 kl. 13:47]

Haha þessi færsla var alveg frábær, þú ert svo góð í að lýsa persónulegum samskiptum á spaugilegan hátt. "mamma rólegur". Hann er snillingur!