Sá Einhverfi í uppsveiflu

 

Það er mikið að gera í vinnunni. Sem er gott. Í rauninni forréttindi á þessum síðustu og verstu...

Það er skrýtið að finna hvað kuldinn dregur úr mér orku og gerir mig þreytta. Í fyrsta skipti sem ég finn að það er ekki skammdegið sem slíkt, heldur veðráttan. Almáttugur hvað ég hljóma öldruð núna.

Sá Einhverfi er í uppsveiflu þessa dagana, sem þýðir að hann slær um sig með nýjum setningum. Eða öllu heldur betrumbættum setningum. Og hann les. Les eins og herforingi. Les blöðin, les á skilti, les á nafnspjöld. Stautar sig fram úr orðum sem hann skilur hvorki upp né niður í og áhuginn virðist óbilandi. Og hann er glaður. Það er mikilvægast af öllu.

Í kvöld var hann að púkast í Vidda Vitleysingi og kettinum Elvíru og systur hennar Khosku og ég horfði á hann með stjörnur í augunum. Einfaldlega vegna þess að á að líta var hann algjörlega eins og ''eðlilegur'' drengur. Örlítið óþekkur. Iðandi af löngun til lítilla óknytta. Augun skær og logandi af kátínu. Andlitið skellihlæjandi yfir hundinum sem ekki náði beininu og Elvíru sem elti systur sína alla leið upp á eftir eldhússkápana.

Var þetta Ian? sagði Bakarafrúin sem ég var að spjalla við í símann. Hún heyrði hláturinn í drengnum.

Já sagði ég, og rak kettina niður af skápunum.

Vá, sagði Bakarafrúin. Þessi hlátur kom alveg neðan úr maga.

Og það er málið. Hláturinn Þess Einhverfa er svo innilegur og einlægur. Eins og hann sjálfur. 

Nú eru allir sofnaðir nema Unglingurinn og ég. En ég ætla að skríða undir hlýja sæng með vanillute og glugga í bókina hans Þráins Bertelssonar, sem sjálfur kallar sig læriföður minn. Mér er heiður að því.

Sofið rótt börnin mín og dreymi ykkur fallega.

 

Athugasemdir

[Anna Guðný , 27.11.2008 kl. 23:48]

Flott uppsveifla hjá stráknum

Amtið 11.des. er komið í dagbókina. panta hér með áritun.

[Jenný Anna Baldursdóttir, 27.11.2008 kl. 23:50]

Oh, hvað þú átt gott að vera með bókina hans Þráins.  Þarf að eignast hana.

[Högni Jóhann Sigurjónsson, 27.11.2008 kl. 23:52]

Hvað er að vera normal, við sem lifum á og í sýndarmennsku eða þau sem eru einlæg og hreinlynd ?

Góða nótt.

[Ómar Ingi, 28.11.2008 kl. 00:01]

[Róslín A. Valdemarsdóttir, 28.11.2008 kl. 00:18]

Góða nótt Jóna mín - hlakka til að sjá þig í næstu viku....

[Erna, 28.11.2008 kl. 00:44]

Sæl Jóna, Nú ræður gleðin ríkjum hjá mér!!!!!!!!!!!!!! Nú skríð ég undan feldi og mæti á amtið Ég er búinn að kaupa bókina þína, en ég hef ekki þorað að opna hana vegna þess að ég er ekki viss um að ég fái bók í jólagjöf, og ef það verður ekki þá á ég þig til góða. Hlakka til að hitta þig Jóna mín

[Jóna Kolbrún Garðarsdóttir, 28.11.2008 kl. 02:39]

En gaman að lesa hversu kátur Ian er.  Og hvað honum gengur vel.  Til hamingju með drenginn þinn

[Jóna Kolbrún Garðarsdóttir, 28.11.2008 kl. 02:58]

Smá hugmynd sem ég sá hjá bloggara áðan, allir að lesa þetta   http://mariataria.blog.is/blog/mariataria/entry/727776/#comment1964793   Allir að mæta  á mótmælafundinn á laugardaginn, hitta þessa konu og reka þá sem maður vill burt

[Guðríður Pétursdóttir, 28.11.2008 kl. 09:31]

Gott að heyra að hann er glaður, vildi að þú værir glaðari..

Ég er alveg að fíla kuldann og veðrið upp að vissu marki. Ég labba alltaf með Flóka í leikskólann og sæki hann svo aftur og þessi tími sem ég labba er alveg einstaklega næs.. þá sérstaklega þegar ég er búin að fara með hann í leikskólann og er að labba heim, ein..og það er ennþá dimmt.

Svo líður mér svo vel þegar ég er skriðin upp á 4 hæðina og sest niður.. líður eins og það hafi einhver nuddað mig með bláum ópal, þvílíkt fersk

[Rut Sumarliðadóttir, 28.11.2008 kl. 11:19]

Ég bíð eftir Þránni líka, vona að ég fái hana í jólagjöf. Strákurinn þinn er yndi.

[Hrönn Sigurðardóttir, 28.11.2008 kl. 11:20]

[Unnur Fríða Halldórsdóttir, 28.11.2008 kl. 12:12]

Sæl var að byrja lesa um ykkur  í bókinni þinni , til hamingju að hafa sett þessa dagbók á prent, vel gert , gangi ykkur vel með allt nú á aðventu

og öll skiltin og lesturinn , váá kv Unnur Fríða

[Ásdís Sigurðardóttir, 28.11.2008 kl. 14:36]

Eitthvað svo ljúf og notaleg færsla. Gaman að heyra af dýrunum !! knús á Khosku krútt frá mér.  Eigið ljúfa helgi.

[Jóhanna Magnúsar- og Völudóttir , 28.11.2008 kl. 15:32]

[LBH (IP-tala skráð) 28.11.2008 kl. 18:24]

Góða helgi kæra bloggvinkona!

[Brynja Dögg Ívarsdóttir, 28.11.2008 kl. 19:57]

Hafðu það sem best, Emma biður að heilsa hundinum og köttunum og sendir þeim andlitsþvott.

Kv Gleymmerei og Emma.

[Margrét L. Laxdal (IP-tala skráð) 28.11.2008 kl. 21:23]

Hef ég lesið rétt ... verður frú Jóna á Amtinu á Akureyri 11. desember??!!!  Ef svo er þá hreinlega VERÐ ég að mæta!!  Er það til að lesa upp úr bókinni eða er von um áritun í leiðinni?  Bara að vita hvernig maður á að undirbúa sig  

Vá ... mér líður næstum eins og ég sé að fara á mitt fyrsta stefnumót - ég er svo spennt að hitta goðið   Hlakka til að hitta þig í eigin persónu!

[Margrét L. Laxdal (IP-tala skráð) 28.11.2008 kl. 21:39]

Sé að lesa á m.a. úr bók þinni á bókmenntakvöldi hérna á Dalvíkinni á þriðjudagskvöldið kemur (2. des) ... fannst mjög ánægjulegt að sjá þína bóka þarna á meðal hinna   Sendi þér hérna fréttina um kvöldið en ég tók þetta af heimasíðu Dalvíkurbyggðar www.dalvik.is

Þriðjudaginn 2. desember næstkomandi verður haldið bókmenntakvöld á veitingastaðnum Við Höfnina en það er Bókasafn Dalvíkur sem stendur fyrir þessari uppákomu. Þar munu heimamenn lesa úr nýútkomnum bókum sínum og annarra. Þetta er þriðja bókmenntakvöldið sem haldið hefur verið og hefur aðsókn farið vaxandi ár frá ári enda er þetta mjög skemmtileg stund fyrir alla bókaunnendur. Það er því um að gera að fjölmenna og eiga saman notalegt kvöld með kaffi, piparkökum og kertaljósi.

Dagskrá:

Júlíus Júlíusson - Meistarinn og áhugamaðurinn
Heiðrún Villa Friðriksdóttir - Gerðu besta vininn betri

Einnig verður lesið upp úr eftirtölum bókum:

Gullastokkur gamlingjans - Vilhjálmur Hjálmarsson á Brekku
Vetrarsól - Auður Jónsdóttir
Ég skal vera Grýla - Margrét Pála Ólafsdóttir
Sá einhverfi og við hin - Jóna Á. Gísladóttir
Ég hef nú sjaldan verið algild - Anna M. Guðmundsd. frá Hesteyri
Ég, ef mig skyldi kalla - Þráinn Bertelsson

[Hólmgeir Karlsson, 28.11.2008 kl. 23:29]

Innlitskvitt og bros :)

[Sifjan, 29.11.2008 kl. 19:45]

Það verður fjölmennt á Amtinu.... ég mæti pottþéttt !!! 

 Verður bara frábært að "hitta" þig.  

[alva (IP-tala skráð) 30.11.2008 kl. 01:50]

Bestu kveðjur!!

[Jens Guð, 30.11.2008 kl. 03:02]

[Sigríður Þórarinsdóttir, 30.11.2008 kl. 04:20]

Búin með bókina þína, hún er frábær eins og þú sjálf. Knús.

[Gunnar Helgi Eysteinsson, 30.11.2008 kl. 17:34]

 Yndisleg færsla.. eins og venjulega.

P.S.
Ég er búinn að skrifa færslu þar sem þú ert aðalpersónan...

[Helga Magnúsdóttir, 30.11.2008 kl. 23:12]

OO, hann Ian er þvílíkt dásamlegur. Ég sem var sannfærð um það eftir að hafa farið á Rain Man að einhverfir væru óalandi og óferjandi. Svo kemur þú með þennan snilling og allt fer á hvolf.

[Róslín A. Valdemarsdóttir, 1.12.2008 kl. 00:14]

Jóna þú verður í bandi ef þú hefur tíma....