Töfralausnin fundin?

 

Ég held ég hafi dottið niður á töfralausn í gær. Á vansæld Þess Einhverfa þegar breytt er út af venjulegri rútínu.

Mér var búið að hálfkvíða fyrir mánudeginum því það er mögnuð vika framundan hjá drengnum og ekki seinna vænna að kynna dagskrána fyrir honum.

Mér datt skyndilega í hug að setja upp vikuplanið í Excel í tölvunni hér heima. Hafa það skriflegt frekar en myndrænt. Skýrt og skorinort.

Þegar ég var sátt við niðurstöðuna, mundu ég skyndilega eftir litunum á dögunum. Í Öskjuhlíðaskóla læra krakkarnir meðan annars að þekkja vikudagana eftir litum. Sá Einhverfi var mjög fljótur að tileinka sér það strax í fyrsta bekk. Hver vikudagur hefur sinn lit. Ég ákvað að merkja hvern dag með sínum lit.

Svona lítur þetta út:

 

Mánudagur	Þriðjudagur	Miðvikudagur	Fimmtudagur	Föstudagur	Laugardagur	Sunnudagur
19.maí	20.maí	21.maí	22.maí	23.maí	24.maí	25.maí
Rúta	Rúta	Rúta	Rúta	Rúta	Mamma kemur	Mamma og Ian
Skóli	Skóli	skóli	skóli	skóli	í sveitina	fara í bílinn
Vesturhlíð	Vesturhlíð	Vesturhlíð	Vesturhlíð	Vesturhlíð		og heim
rúta	rúta	rúta	rúta	Fríða sækir Ian	mamma lúllar
heim	heim	Hólaberg	Hólaberg	í bílinn	með Ian í sveitinni
				í sveitina

 

Svo kallaði ég á stráksa sem settist í fangið á mér fyrir framan tölvuskjáinn. Ég sagði ekki eitt einasta orð en fylgdist með honum renna augunum yfir handbragðið.

Hann virti skjáinn nokkuð lengi fyrir sér, stóð svo upp og gekk í burtu. Ég varð svolítið hissa en gerði ráð fyrir því að hann hefði ekki skilið það sem hann var að horfa á. Svo ég kallaði á hann aftur og í þetta skiptið las ég yfir hvern dag fyrir sig og fylgdi línunum með fingrinum. Hann horfði þegjandi á en myndaði orðið ''Hólaberg'' með vörunum.  Fyrir þá sem ekki vita þá bregst krakkinn venjulega vægast sagt illa við því orði, sem og öllum öðrum tilkynningum um breytta dagskrá.

Að lestri loknum, stóð hann upp, fór upp í herbergið sitt og stuttu síðar heyrði ég hann syngja um fullorðna fólkið sem er svo skrítið og er alltaf að skamma mann.

Ég var enn opinmynnt af undrun þegar Bretinn kom heim.

Ég krosslagði líka fingur þegar drengurinn byrjaði að þylja vikudagskránna orðrétt frá efri hæðinni. Beið eftir kastinu. Sem aldrei kom.

En hann þuldi svo fjandans dagskránna allt að því stanslaust í klukkustund. Og svo byrjaði hann að stríða mér með því að fara rangt með hana og hló eins og vitleysingur þegar ég leiðrétti hann.

Ég vona að ég sé dottin niður á töfralausnina á mesta vandamálinu í umgengni við snúllann minn. Hvort það eru stafir í stað teikninga, skjár í stað pappírs eða litirnir... ég veit það ekki. En puttarnir verða krosslagðir þar til þetta tiltekna vikuplan rennur sitt skeið.

 

Athugasemdir

[Ragnheiður , 20.5.2008 kl. 00:35]

Nei vá ! Alveg magnað. Hann virðist sætta sig við þetta ef hann les það svona í réttum farvegi ?

Sá er skemmtilegur og kemur sífellt á óvart.

Æ LOV IT

[Jóna Á. Gísladóttir, 20.5.2008 kl. 00:37]

Ragga. Kannski fékk hann nóg af lélegum teikningum móðurinnar . Ég er enn að bíða eftir kastinu. This is almoust too good to be true, you know.

[Andrea, 20.5.2008 kl. 00:46]

Flott plan - og enn flottara ef það virkar

[Loopman, 20.5.2008 kl. 01:15]

Þessi einhverfu einstaklingar læra jafnvel oftar en ekki að þekkja orð frekar en myndir eða liti. Það er því miður allt of lítið notað hér á landi að kenna þeim orð, heldur er margir fastir í myndum og orðum, og átta sig ekki á því að það er orðið en ekki myndin sem skiptir máli. Það var mín reynsla og kollega minna þegar ég vann ég með einhverfum börnum.

[Hólmdís Hjartardóttir, 20.5.2008 kl. 02:53]

Vonandi er þetta lausn....kveðja frá frænku einhverfs drengs

[Hólmdís Hjartardóttir, 20.5.2008 kl. 02:55]

Loopman er orðinn ráðgjafi þinn

[Hulla Dan, 20.5.2008 kl. 03:51]

Þú ert snillingur

Eigðu góðan dag.

[Þórarinn Þ Gíslason (IP-tala skráð) 20.5.2008 kl. 05:25]

Sæl.

Þrælmögnuð frásögn.já það er svo margt sem við hin eigum eftir ÓLÆRT.

Gangi ykkur sem best.

[Linda litla, 20.5.2008 kl. 08:12]

Frábært... vonandi þarftu bara að bíða endalaust, kannski kemur ekkert kast

Hafðu það gott Jóna mín.

[Rúna Guðfinnsdóttir, 20.5.2008 kl. 08:42]

Góð hugmynd  Ef hann væri ekki sáttur, þá kæmi það strax fram, er það ekki??   Kveðjur..

[Helga Linnet, 20.5.2008 kl. 10:03]

Þetta merkir að drengurinn veit miklu meira í sinn koll en gert er ráð fyrir

Frábært ef þetta virkar svona. Vinkona mín gerir þetta nákvæmlega svona fyrir sína dóttur.

Ég hefði þurft að gera þetta svona líka fyrir mína stelpu....en ég hafði ekki vit á því. Tók bara á því þegar kastið kom! (hún er ekki einhverf...en með verulega þroskaskerðingu með tilheyrandi vandamálum)

[Hlín (IP-tala skráð) 20.5.2008 kl. 10:22]

Sæl Jóna vildi bara kvitta fyrir mig les oft bloggið þitt finnst mjög forvitnilegur þessi heimur sem einhverfir lifa í, þekki aðeins til maðurinn minn vann með einum snilling sem er einhverfur og heillaði mann alveg uppúr skónum vonandi gengur vel með vikuplanið.

[krossgata, 20.5.2008 kl. 12:32]

Alltaf er Ian að koma á óvart og snúa á hana mömmu sína  Hann er húmoristi inn við beinið.

[Högni Jóhann Sigurjónsson, 20.5.2008 kl. 12:51]

Ókey, er á meðan er, nú er bara að bíða og sjá hvernig úr rætist.

[Linda Linnet Hilmarsdóttir, 20.5.2008 kl. 12:54]

Innlitskvitt og bestu kveðjur

[Anna Gísladóttir, 20.5.2008 kl. 12:59]

Publisher og Exel eru algjör snilld

Hvað er netfangið þitt ?  Mig langar svo að senda þér sýnishorn af því sem að ég geri í publisher .....

[Gunnar Helgi Eysteinsson, 20.5.2008 kl. 13:53]

Við erum búinn að nota svona vikuplan fyrir Róbert okkar í nokkur ár og það virkar ótrúlega vel. Ég man eftir því þegar Róbert sá þetta í fyrsta skiptið og skildi hvað vika var... æðislegt.

[Ómar Ingi, 20.5.2008 kl. 17:01]

Sástu þennan snilling í fréttunum í gær

http://vefmidlar.visir.is/VefTV/?channelID=&programID=d93d6ddc-f3df-4c27-90e2-28d49738f306&mediaSourceID=a7709a86-6c59-4658-8ba8-bf2b04009132&mediaClipID=e81b764b-c338-4aea-b057-2a3290954f56

 

Hann var í skóla með Inga mínum og ég held að hann hafi þarna talað meira en öll árin sem hann var í skólanum.

 

Snillingur

[Ragnheiður , 20.5.2008 kl. 19:17]

Kom kastið ?

[Helga Magnúsdóttir, 20.5.2008 kl. 21:17]

Þetta er snilldarhugmynd, vonandi er þetta ekki bara frestur á kasti heldur varanleg lausn.

[Bergljót Hreinsdóttir, 20.5.2008 kl. 22:41]

Flott tilraun og vonandi skotheld lausn.....

[Ásgerður , 21.5.2008 kl. 14:17]

Frábær hugmynd,,,yndislegur strákur sem þú átt

Þetta er eitthvað sem ég þyrfti að gera fyrir minn,,,kannski ekki alveg svona,,en þetta gefur mér hugmynd,,takk fyrir það

[Hrafnhildur Björk Jónsdóttir, 21.5.2008 kl. 20:28]

Vona að þetta gangi hjá ykkur, kveðja frá mömmu sem á einhverfann son

[Steingrímur Helgason, 21.5.2008 kl. 22:20]

Fullkomið í einfaldleika sínum & skýrri framsetníngu.  Drengurinn er náttúrlega móttækilegri á hans 'heimavelli' þarna, eins & þú brillaðir á að detta niður á.

Sko stelpuna skýru.

[DORIS (IP-tala skráð) 22.5.2008 kl. 22:39]

Innilega til hamingju með þennan auðvelda og einfalda lausn til að kynna fyrir Ian breytingar á dagskráinn  ! Þú ert snilling  !