Rembist eins og rjúpan við staurinn

við að reyna að tengja mynd við bloggfærsluna mína. Gengur ekki.

Hey... I'm new in town, ekki gera grín að mér.

Hef ýtt á hjálp, lesið leiðbeiningarnar, skil þær en það er greinilega ekki nóg. Ég hef afritað og skeytt, klippt og skorið, vistað og falið, eytt og afmáð. Unnið með myndir, albúm, flokka og guð má vita hvað...... Meira að segja kallað til tölvunördinn manninn minn. Allt kemur fyrir ekki. Augun eru orðin ferköntuð og ég held bara að það sé komið að tímapunktinum í lífinu þar sem ég verð að horfast í augu við að fullkomna sjónin mín er að láta í minni pokann fyrir ellifjarsýninni. +1 gleraugun úr Tiger liggja á borðinu fyrir framan mig og glotta við mér. Ég ætla að hætta núna svo ég verði jafn hárprúð í fyrramálið og ég var í morgun.

Athugasemdir

[Níels A. Ársælsson., 28.3.2007 kl. 01:06]

Hárprúð. Ég hef ekki getað komið inn mynd í allan dag, svo ég álít að kerfið sé bilað hjá moggablogg. Sorrý Marilyn !

[Jóna Á. Gísladóttir, 28.3.2007 kl. 14:48]

Níels, þakka þér fyrir upplýsingarnar. Sjálfstraustið var orðið ansi laskað en er nú bjargað fyrir horn.